ສຸກສັນວັນເກີດ
ເວລາຜ່ານໄປ ໄວປານມີປີກບິນ ບໍ່ພໍຄາວອາຍຸຂອງຫວານໃຈກໍກ້າວເຂົ້າສູ່ເລກທີ 14 ແລ້ວ. ມື້ນີ້ແມ່ນມື້ຄົບຮອບວັນເກີດຂອງນາງພໍດີ. ພໍ່ກັບແມ່ໄດ້ຈັດງານວັນເກີດໃຫ້ແກ່ນາງໂດຍເຊື້ອເຊີນຍາດພີ່ນ້ອງ ແລະໝູ່ຄູ່ໃກ້ຄຽງເຂົ້າຮ່ວມ. ການກະກຽມງານສະຫຼອງວັນເກີດ ແມ່ນເລີ່ມມາຕັ້ງແຕ່ເຊົ້າ ໂດຍເອື້ອຍສອງຄົນອອກຕະຫຼາດ ຊອກຊື້ຜັກນາງອາງຫຍ້າແລະຊີ້ນໜັງມັງສາມາປຸງເຮັດເປັນອາຫານ ສໍາລັບແຂກຄົນໃນຄໍ່າມື້ນີ້. ສ່ວນນາງກັບພໍ່ແມ່ກໍພາກັນອະນາໄມເຮືອນ ຈັດສະຖານທີ່ໃຫ້ເປັນສະອາດງາມຕາ. ເມື່ອຕາເວັນລັບຂອບຟ້າໄປແລ້ວ ການກະກຽມງານກໍສໍາເລັດເສັດສິ້ນ.
ຫຼັງຈາກຊໍາລະຮ່າງກາຍແລ້ວ ຫວານໃຈກໍແຕ່ງໂຕໂດຍນຸ່ງຊຸດໃໝ່ທີ່ແມ່ຊື້ໃຫ້ເປັນຂອງຂວັນ. ນາງຢືນແຍງຄີງໂຕເອງດ້ວຍດວງໜ້າທີ່ປ່ຽມລົ້ນດ້ວຍຮອຍຍິ້ມແຫ່ງຄວາມ ພູມໃຈຕໍ່ລັດສະໝີຄວາມງາມທີ່ເປັ່ງປະກາຍອອກຈາກເງົາໃນ ແວ່ນແຜ່ນໃຫຍ່. ອີກບໍ່ທໍ່ໃດນາທີ ໝູ່ຄູ່ຂອງນາງກໍຈະເດີນທາງເຂົ້າຮ່ວມສະຫຼອງວັນເກີດຂອງນາງແລ້ວ, ນາງຮູ້ສຶກຕື່ນເຕັ້ນຈົນໄດ້ຍິນສຽງສະທ້ອນຂອງຫົວໃຈ…
ແສງໄຟນິອອນ ສີຂາວນວນສາດສ່ອງໃສ່ດວງໜ້າໃສທີ່ມຸມພິສົບລົ້ນອັ່ງໄປດ້ວຍຮອຍ ຍິ້ມອັນຫວານສົມຊື່ຂອງເຈົ້າຂອງງານວັນເກີດ…
“ສຸກສັນວັນເກີດເດີ, ຫວານ!” ສຽງໃສໆຈາກໝູ່ສະໜິດຜູ້ຊື່ “ດາ” ດັງກ້ອງເຂົ້າຫູ ພ້ອມດ້ວຍຂອງຂວັນຫໍ່ງາມໆຍື່ນໃຫ້ຈາກມືຂອງໝູ່ຮັກຜູ້ຊື່ “ຕ້າ”. ນອກຈາກນັ້ນກໍມີຜູ້ຢິບຜູ້ຍື່ນບໍ່ຈັກວ່າຊອງຂາວ, ຫໍ່ຂອງຂວັນ, ເງິນສົດຈາກຍາດພີ່ນ້ອງແລະໝູ່ອີກຈໍານວນໜຶ່ງ ຈົນນາງຮັບເອົາຄໍາອວຍພອນ ແລະຂອງຂວັນນໍາເກືອບບໍ່ທັນ.
“ກຽມເປົ່າເຄັກເດີ!” ນ້າສາວໃບຜູ້ກະກຽມເຄັກວັນເກີດມາແຕ່ໃນເມືອງບອກຜູ້ເປັນຫຼານ ພ້ອມທັງເອົາໄຟແຊັກໄຕທຽນໄຂສີຈໍານວນ 14 ເຫຼັ້ມ. ບັນດາໝູ່ຄູ່ຮຸ່ນດຽວກັນ ແລະເດັກນ້ອຍທີ່ເປັນລູກຂອງນ້າສາວ ພ້ອມດ້ວຍບັນດາແຂກຜູ້ໃຫຍ່ພາກັນຢືນອ້ອມໂຕະເຄັກ ສົ່ງສຽງອວຍພອນເປັນເພງສຸກສັນວັນເກີດໃນເວີເຊິນພາສາອັງກິດ: “Happy birthday to you… Happy birthday to ຫວານໃຈ”
ເມື່ອສຽງເພງສິ້ນສຸດ ສາວນ້ອຍຫວານໃຈກໍເປົ່າໄຟເທິງທຽນທັງສິບສີ່ເຫຼັ້ມດັບມອດລົງ. ແສງໄຟເຫຼື້ອມມາບໆຈາກກ້ອງຖ່າຍບໍ່ຈັກຈາກແຈໃດຕໍ່ແຈໃດ…
“ຍິ້ມຫວານໆແດ່!” ສຽງນ້າເຂີຍຮ້ອງໃສ່ພ້ອມທັງກົດກ້ອງດັງແກຼັ໊ກ.
“ຖ່າຍເຮົາກັບແມ່ ແດ່!” ຫວານໃຈບອກນ້າເຂີຍ ພ້ອມທັງນໍາເອົາຂອງຂວັນທີ່ໄດ້ໂດຍສະເພາະແມ່ນເງິນແລະ ຊອງຂາວມອບໃຫ້ຜູ້ແມ່. “ນີ້ແມ່ນຂອງຂວັນສໍາລັບແມ່ ເພາະແມ່ເປັນຜູ້ໃຫ້ກໍາເນີດແກ່ຊີວິດຂອງລູກ. ລູກຂໍສະແດງຄວາມຮູ້ບຸນຄຸນຕໍ່ແມ່ ແລະຈະເປັນລູກທີ່ດີຂອງແມ່ຕະຫຼອດໄປ.” ເວົ້າສຸດນາງກໍເຂົ້າໄປໂອບກອດແມ່ດ້ວຍຄວາມຮັກແລະບູຊາ. ແມ່ຮູ້ສຶກເໝືອນມີຫຍັງມາຕັນຢູ່ຮູຄໍ ດວງຕາຮ້ອນວູ່ໆຄືກັບວ່າເຂື່ອນນໍ້າຕາຊິພັງອອກມາ.
ພໍ່ທີ່ຢືນ ຄຽງຂ້າງນັ້ນ ກໍຮູ້ສຶກເຊັ່ນດຽວກັບຜູ້ເປັນແມ່ ແນມເບິ່ງສອງແມ່ລູກໂອບກອດກັນຢ່າງປື້ມໃຈ. ໝູ່ຄູ່ແລະແຂກຄົນທີ່ມາໃນງານຕ່າງກໍຮູ້ສຶກເປັນສີຄ້ອຍໆ ໃຈກັບພາບດັ່ງກ່າວ…
“ແລະນີ້ແມ່ນຂອງຂວັນສໍາລັບພໍ່.” ນາງເອົາພາບແຕ້ມຈາກສີມືຂອງນາງມອບໃຫ້ ແລະເຂົ້າສວມກອດພໍ່ດ້ວຍຄວາມເຄົາລົບຮັກ…
--------------------
No comments:
Post a Comment